КЛЯВА, рака ў Ашмянскім і Іўеўскім р-нах, левы прыток Гаўі (бас. Нёмана). Даўжыня 56 км. Пл. вадазбору 270 км2. Сярэднегадавы расход вады ў вусці 2,3 м3/с. Сярэдні нахіл воднай паверхні 1 %. Пачынаецца на ПнЗ ад в. Клявіца ў Ашмянскім р-не. Асноўны прыток — р. Трапятушка. Даліна выразная. Пойма двухбаковая (шырыня 100—400 м), месцамі адсутнічае. Рэчышча на працягу 17,6 км каналізаванае: ад в. Клявіца да в. Доржы (8 км) і ад в. Ганчары да в. Пашкішкі (9,6 км). Яго шырыня ў межань 3—7 м, у ніжнім цячэнні 10—12 м. Прымае сцёк з сеткі меліярацыйных каналаў.