ВОЛКА, рака ў Мінскай і Гродзенскай абласцях, левы прыток Бярэзіны (бас. Нёмана). Даўжыня 36 км. Пл. вадазбору 391 км2. Сярэднегадавы расход вады ў вусце 2,9 м3/с Сярэдні нахіл воднай паверхні 0,8 %. Пачынаецца за 2,5 км на ПнЗ ад х. Рудня Валожынскага р-на, упадае ў Бярэзіну за 7 км ніжэй в. Бакшты. Цячэ па Налібоцкай пушчы. Даліна невыразная. Пойма вузкая, забалочаная, пад лесам і хмызняком- шырыня 10—15 м, у сярэднім і ніжнім цячэнні да 200 м. Рэчышча звілістае, разгалінаванае ў сярэднім цячэнні, на працягу 5 км ад вытоку каналізаванае- шырыня ў межань у вярхоўі 1—3 м, ніжэй 3—8 м. Берагі стромкія, абрывістыя, невысокія.